धरानका रोहितको ‘प्रिय तिमीलाई’ सार्वजनिक (भिडियोसहित)


  • हाम्रो कोशी आवाज
  • २०७७ भदौ २६

धरानः धरान आफैमा साङ्गीतिक उर्वरभूमिको रूपमा पहिलेदेखि नै प्रख्यात छ । धरानमा पहिलेदेखि नै ‘प्रोफेसनल’ रुपमा होस् या सौखको रूपमा होस धेरैजसो युवाहरू सङ्गीतमा लागेका नै हुन्छन् र त्यसमा कोही सफल पनि भएका छन् र कोही असफल त कोही आफ्नै घरायसी कामकाजमा फँसेर चाहेरपनि निरन्तरता दिन सकिरहेका हुँदैनन् । यस्तै धरानका एक पुराना गायक हुन् रोहित मास्के । उनले करिब अढाई दशकपछि आफ्नो नयाँ गीत ‘प्रिय तिमीलाई’ म्युजिक भिडियो सहित भर्खरै मात्र रिलिज गरेका छन् ।
२०४९ सालताका ‘निश्चल’ नामक साङ्गीतिक एल्वम बजारमा ल्याएका गायक रोहितको टेक्सी टेक्सी, मेरी मायालु बोलका गीतहरू त्यसबेला रुचाइएका थिए र सो एल्वममा उनले त्यसबेला नाम चलेका चर्चित गायिकाहरू सुक्मित गुरुङ, सपनाश्री परियार र भगवती तुम्वाहाम्फेसँगै युगल गीतहरु समेत गाएका थिए ।
धरानको देउसीभैलोदेखि विभिन्न साङ्गीतिक कार्यक्रममा आफूलाई अब्बलरूपमा अगाडि बढाएपनि एल्वम निकालेको केही समयपछि नै उनले हङकङलाई आफ्नो कर्मथलो बनाएका थिए । जसले गर्दा त्यसपछि भने उनी उतै भुलिए । उता हुँदापनि यदाकदा फुर्सदको केही समय सङ्गीतमा रमाउने मौका पाएका रोहितले केही गीतहरू रेकर्ड गराए भने उतै निर्मित ‘चुकेको चुरा’ नामक चलचित्रमा सङ्गीत तथा स्वर समेत दिएका छन् ।
हङकङमा हुने साङ्गीतिक कार्यक्रममा पनि उनी छुट्दैन थिए । केही वर्षअघि मात्र उनी आफ्नै जन्मथलो धरान नै बस्ने गरी फर्किएका छन् । धरान आएपछि भने, ‘उनले आफ्नो काम सँगसँगै आफ्नो सांगीतिक शोख पनि पूरा गरिरहेका छन् । धरानमा हुने यदाकदा विभिन्न साङ्गीतिक कन्सर्टहरूमा झुल्किरहने गायक रोहितले कोरोना महामारीले ल्याएको लकडाउनको सदुपयोग गर्दै धरानका अन्य सङ्गीतकर्मीहरू सञ्जीव लामा, हेम सुब्बा र मनोज मोतेको सहयोगमा ‘हामी बाँचौ’ बोलको सन्देशमूलक गीत निकाले । गीतको राम्रो प्रतिक्रियाले हौसिएका गायक रोहितले पहिलो लकडाउनमा सङ्गीत दिवस, मलाई धेरै धेरै माया लगायतका गीतहरू पनि निकाले ।
अहिले भने उनले सञ्जीव लामाको शब्द, सङ्गीत र निर्देशनमा ‘प्रिय तिमीलाई यो जुनीभरी’ बोलको गीत भिडियोसहित आफ्नै युट्युब च्यानलमार्फत् रिलिज गरेका छन् । प्रशान्त तामाङले छायाङ्कन तथा सम्पादन गरेको गीतको भिडियोमा लाजु श्रेष्ठको अभिनय रहेको छ ।
धरानको धरान सङ्गीत प्रतिष्ठानमा समेत कोषाध्यक्षको रूपमा आवद्ध रहेका गायक अब भने पहिलेदेखि साँचेका र केही नयाँ गीतहरु तुरुन्तै रेकर्ड गर्नका लागि लागिपरेका छन् । आफ्नो समयमा नगरेपनि निरन्तरताको लागि भएपनि धरानको सङ्गीत क्षेत्रलाई टेवा पुग्ने काम गरिरहने सोंच छ गायक रोहितको ।

प्रतिक्रिया

  • प्रबन्ध निर्देशकः डम्बरकुमार तुम्वापो
  • निर्देशकः राजेन्द्र गुरूङ
  • प्रधान सम्पादकः महेश श्रेष्ठ
  • सम्पादक/प्रकाशकः शेखरनाथ जोगी
  • फोटो सम्पादकः लक्ष्मण थापा
  • सल्लाहकारः हर्ष सुब्बा, गौरवमान श्रेष्ठ, भीम लिङ्थेप