धरानमा तरकारीको मूल्य अचाक्ली बढ्यो

टमाटर ११० रुपैयाँ केजी, सम्बन्धित निकाय देखेपनि नदेखेकै पारामा, ग्राहक, व्यवसायीले नै मास्क समेत लगाउँदैनन्


  • हाम्रो कोशी आवाज
  • शुक्रबार, साउन १६, २०७७

धरानः धरानमा तरकारीको भाउ अचाक्ली बढ्दा पनि सम्बन्धित निकाय देखेपनि नदेखेझैं गरिरहेको छ ।
अहिले सब्जी बजारमा आलु १००, टमाटर ११०, प्याज ४० रूपैयाँ, अन्य हरियो तरकारीजति सबै १०० रुपैयाँ केजीभन्दा तल छैन । टमाटर भारतबाट आउनुपर्ने भएकोले नआएको व्यवसायी बताउँछन् । धरान–९ का सब्जीमण्डीमा व्यवसाय गर्दै आएका सब्जी व्यवसायी अखलेस जैसवालले अहिले कृषि बजारबाटै सामान ल्याउँदा महङ्गो पर्ने बताए । ‘कृषि बजारमै आलुको भाउ ९० रूपैयाँ छ’, उनले भने, ‘यहाँ ल्याएपछि ५ रूपैयाँ बढी परेको हो ।’
व्यापारीले अहिले विभिन्न बहानामा तरकारी तथा अन्य दैनिक उपभोग्य वस्तुको मूल्य अचाक्ली बढाएका छन् तर सम्बन्धित निकाय मौन बसेको धरान–१९ की उपभोक्ता सीता लिम्बू बताउँछिन् । ‘३–४ दिनअघिसम्म ५० रूपैयाँ किलोमा किनेको टमाटर ११० रुपैयाँ भएछ, यो कसरी यस्तो हुन्छ भन्नेबारेमा अनुगमन गर्ने निकाय छैन ?’ उनले प्रश्न गरिन् ।
विचौलियाका कारण तरकारी अस्वाभाविक रूपमा बढ्दा र कालोबजारी हुँदासमेत अनुगमन गर्ने निकाय कानमा तेल हालेर बसेको उपभोक्ताको भनाइ छ । ‘खै अहिलेसम्म धरानको तरकारीमा अनुगमन भयो रे भन्ने समेत सुनेकी छैन, जति दाम छ, त्यति नै हालेर खानुपरिरहेको छ ।’ धरान–९ की गृहिणी सर्मिला श्रेष्ठले भनिन् । व्यापारी तथा विचौलियाले वर्षा र बाढीको बहानामा हरियो तरकारीको मूल्य तेब्बरसम्म बनाउँदा रमिते बन्नु दुःखद भएको उनले बताइन् ।
व्यवसायीले अविरल वर्षा, बाढी–पहिरो जस्ता कारण देखाएपनि उपभोक्ता मान्न तयार छैनन् । व्यवसायीहरूले भने वर्षाकै कारण अहिले भाउ बढेको बताएका छन् । बजारमा तरकारीको भाउ वर्षा शुरू भएपछि हवात्तै बढेको धरानका खुद्रा व्यवसायी शुक्र लिम्बूले बताउँछन् । तराईबाट आउने तरकारी सहजै आउन छोडेको र भारतबाट आउने तरकारी समेत नाका बन्द भएका कारण रोकिएको व्यवसायी बताउँछन् ।
आखिर जे कारणले तरकारीको भाउ बढेपनि बिहान–बेलुका आम सर्वसाधारणको भान्सामा पाक्ने तरकारीको मूल्यवृद्धिले निम्न आय भएका नागरिकहरुको जीवन असहज बनेको छ ।
यस्तै, सबैभन्दा बढी सरकारी नियम पालना नहुने धरान–९ को सब्जीमण्डी र पालिका बजारको सब्जीमण्डी पर्दछ । मानिसको आउजाउ उत्तिकै छ । त्यहाँ व्यवसायीदेखि उपभोक्तासम्मले मास्कसमेत लगाएको पाइँदैन । स्थानीय व्यवसायी विद्यानन्द जैसवाल मास्क नलगाइ आउनेमा व्यवसायी साथै उपभोक्ता पनि रहेको बताउँछन् । ‘व्यवसायी र उपभोक्ताले नै हेलचेक्रयाइँ गर्दा दुःख लाग्छ ।’

मास्क नलगाइ बेचिरहेका व्यवसायी ।

प्रतिक्रिया

  • प्रबन्ध निर्देशकः डम्बरकुमार तुम्वापो
  • निर्देशकः राजेन्द्र गुरूङ
  • प्रधान सम्पादकः महेश श्रेष्ठ
  • सम्पादक/प्रकाशकः शेखरनाथ जोगी
  • फोटो सम्पादकः लक्ष्मण थापा
  • सल्लाहकारः हर्ष सुब्बा, गौरवमान श्रेष्ठ, भीम लिङ्थेप