धरानः धरानस्थित बीपी कोइराला स्वास्थ्य विज्ञान प्रतिष्ठानमा कायरत् मेडिकल अफिसरहरू काम छोडेर धर्नामा बसेका छन् । तलब नबढेपछि उनीहरू धर्नामा बसेका हुन् ।
बिहीबार बिहान उनीहरू उपकुलपतिको कार्यालय अगाडि धर्ना बसे । उपकुलपतिलाई पहिल्यै तलब वृद्धिबारे जानकारी गराएपनि खासै सुनुवाई नभएपछि उपकुलपतिकै कार्यालय अगाडि धर्नामा बसेको उनीहरूले बताएका छन् ।
सबै (कर्मचारी, प्रोफेसर, डाक्टर, नर्स, सेक्युरिटी गार्ड, नर्स, उपकुलपति आदि) सबैको तलब छुट्याइएको तर मेडिकल अफिसरलाई भेदभाव गरिएकोप्रति आफूहरूको आपत्ति रहेको उनीहरूको भनाइ छ । एक वर्षदेखि नै तलबबारे कुरा उठाएपनि एकपटक पनि माग सम्बोधन हुन नसकेको उनीहरूको गुनासो छ ।
‘अघिल्लो वर्ष डेंगुको बेला भ्याइएन भनियो साथै कार्यवाहकले केही गर्न नसकिने भनियो, यसपटक कोभिड–१९ को बहाना बनाइयो ।’ एक डाक्टरले गुनासो पोखे । आठौं तह मेडिकल अफिसरको तलब ४५ हजार ७ सय ४६ रूपैयाँ भएको (भत्ता सुविधाबाहेक) तर २९ हजारमा ५ वर्षदेखि कार्यरत् रहेको बताएका छन् । ‘हामी त आठौं तहका मेडिकल अफिसर हौं’, एक डाक्टर भन्छन्, ‘पोष्ट र तलबमै बीपी प्रतिष्ठानले शोषण गरेको छ ।’
आफूहरू एनएमसी पास र नम्बर पाएको मेडिकल डाक्टर भएको बताउँदै ट्रेनीको हिसाबमा मात्रै राखेको उनीहरूको गुनासो छ । ‘खासमा अफिसरले पाउने तलब ५० देखि ५५ हजारचाहिँ हो तर २९ हजारमै चित्त बुझाउनुपर्ने अवस्था छ ।’ डाक्टर भन्छन् । उनीहरूले नर्सको तलब ३६ हजार भएको र आफ्नो २९ हजारमै चित्त बुझाउनुको विडम्वना रहेको सुनाए ।
फोटोः हाम्रो कोशी आवाज डटकम