धरानः धरानका हिमाल श्रेष्ठले फेसबुकमा पोष्टयाए–‘मेरो भविष्यहरूको घुमघाम चिन्डेडाँडा ।’
‘रमाइलोका कारण मुड फ्रेस पनि हुने, साना साना नानीहरूले केही कुरा पनि सिक्ने भन्दै निस्किएका हौं’ उनले भने । लामो समयको लकडाउन खुकुलो भएर केही राहत महसुस गरेका धराने अहिले सामाजिक दुरी कायम गर्दै पारिवारिक घुमघाम गर्ने क्रम बढन थालेको छ ।
धरान–१५ की प्रभा प्रधानले धेरैदिन घरमा बस्दा बस्दा वाक्क लागेको र मुड फ्रेस पार्नकै लागि भएपनि एकदिन निस्किएको सुनाइन् । ‘घरमा बस्दा बस्दा वाक्क भइयो, जौ मुड फ्रेस पार्न भनेर परिवारसँग सल्लाह भएर निस्कियौं र चिन्डेडाँडासम्म हिँडेरै पुगेर आइयो ।’
यस्तै, धरान–१० की विनिशा राई परिवारसहित करिब १० जना हिँड्दै चिन्डेडाँडा पुगेको सुनाउँछिन् । ‘घरमा बस्दा बस्दा वाक्क भइयो, मुड फ्रेस गर्नकै लागि भएपनि निस्कियौं र चिन्डेडाँडासम्म पुगेर फर्कियौं ।’
‘यसअघि मोबाइल, टिभी हेर्दा र घरमा कोचिएर बस्दा बस्दा दिन काट्नै मुस्किल थियो’, धरान–१६ का रजिना लिम्बूले भनिन्, ‘अहिले केही साथीभाइसँग मिलेर खेल्दैछौं ।’
हुन त धराने बिहान–बेलुका शारीरिक कसरत गर्नका लागि पनि विभिन्न ठाउँ पुगेकै हुन्छन् । तर लकडाउनको समयमा कसरत गर्न नपाएपछि अहिले कसरत गर्ने, मुड फ्रेस पार्न निस्किने बढेका हुन् । अहिले विशेषतः बिहान, दिउँसो र बेलुकाको समय पारेर पारिवारिक घुमघाम गर्ने बढेका हुन् । धरान आसपासका क्षेत्र चिन्डेडाँडा, धरान–१३ स्थित बीपी पार्क, विजयपुरको डाँडा, धरान–१३ र १४ मा पर्ने झोलुङ्गे पुल, विष्णुपादुकालगायतका स्थानमा घुमघाम गरेर फिर्ने गरेको धराने बताउँछन् ।
लामो समयसम्म लकडाउन हुँदा जनजीवन प्रभावित भएको थियो । अत्यावश्यकबाहेक सबै सेवा ठप्प थिए । सरकारले व्यक्तिको पैदल आवागमन (भीडभाड नहुने गरी) खोलिदिएपछि धरानमा ‘मुड फेस’ बनाउनेहरू बढेका छन् ।
अहिले धरानको कुरा गर्ने हो भने केही ठाउँमा सडक खाली भएका ठाउँमा बालबालिका पनि बाहिर निस्किएका छन् । साना बालबालिका पनि साइकल लिएर डुलिरहेको दृश्य देखिन थालेको छ । करिब तीन महिनापछि सोमबारदेखि सरकारले लकडाउनलाई केही खुकुलो बनाएको छ ।
फोटोः हाम्रो कोशी आवाज र फेसबुक